بمناسبة إضراب المعلمين و الاراء المتباينة بخصوص هذا الاضراب ما بين مؤيد و معارض و ما بين صعبان عليه او آخر سابب و شاتم ولاعن , و ما بين متعاطف مع المعلمين و مؤمن بقضيتهم و آخر محرضا على استخدام العنف ضدهم كالسي الدكتور عصام شرف و نقابات المعلمين الجديدة ( اللى المفروض تدافع عن حقوقهم دلوقتى بتحرض أولياء الامور على المعلمين ) قررت اشارك بإنى اكتب ذكرياتى كمعلمة
( بالنسبة لى الفارق كبير بين مدرس و معلم و انا احمد الله بقدر ما استطاعت كنت معلمة ) و لكن قبل ان ابدأ ذكرياتى اليوم سأعرض بعض الاراء لبعض الافراد ردا على سؤال طرحته جريدة الوفد الالكترونية: هل توافق على إضراب المعلمين ؟
و بالطبع الاغلبية ردت قالت لأ لكن فيه اللى رد و بس و فيه اللى رد و استفاض. اقروا التعليقات و ما تعلقوش دلوقتى هاستنى ارائكم بعد ما تقروا ذكرياتى و تعيشوا معايا جوانب من ازمة التعليم يمكن عمركم ما للحظة تخيلتوها
بجد الناس بتقول التعليم فاشل و انا باقول مافيش اى حاجة اسمها آدمية عشان يبقى اللى عندنا ده اسمه تعليم.
المطالب مشروعة ونظرا لعدم الاستجابة للمطالب التى قدمت منذ اكثر من ثلاثة اشهر وكان ذلك موعد الاضراب و الوزير لم يستجب للمطالب وكرامة المعلم ضرورة ملحة
Karim Tawfik هو فى ايه يقاااااا هى البلد نقصا شعب عايز يتغير والله حرام بقا !!!!!!!!!!!!
Nour Elsama طبعا لا يعني ايه 3 الف جنيه مرتب اصل مدرسين دول حراميه مش كفايه عيال مش بتفهم منهم حاجة غير الدروس الخصوصية كفايه ان اول يوم مدرس يدخل علي طالب يقول ليه هتاخد درس لا الا مش هتنجح دة هبل وعلي العموم وجود المدرسين في الفصل او في شارع مش هيفيد بحاجة لان المدرسين مفيش حد فيها بشرح ولا في طالب بيفهم منهم غير بدروس خصوصيه هههههههههههههه وانا لو شوفت مدرس في شارع هتف عليه هههههههههههههه
بدير الشرقاوى لو احنا ناس بنعرف قيمة العلم كان الشعب كله طالب بتحسين احوال المعلمين لانه المستفيد الاول من ذلك وكل لبيب بالاشارة يفهم
· طبعا هما لو عايزين يعملوا اضراب يبقى يبطلوا دروس خصوصيه وكل واحد يشتغل بضمير في مدرسته وبعدها يبقى يتكلموا على الاضراب مش عايز ياخد قبل ما نشوف منهم اي حاجه
Shehata Sobhe لا طبعا والتلاميذ ذنبهم اية مش مكفيهم الكادر والحوافز ومكافأة الامتحانات والدروس الخصو صية
Tota Baskota لاء على الاطلاق هل من الممكن ان يضرب اساس كل شىء عن العمل وبعدين هما وخدين حقهم وزيادة من الدروس مش كفاية يعنى ولو خدوا 3000 جنية مش هيدوا دروس يعنى وهيعملوا ضميرهم بجد ده مش هيحصل حرام عليهم دول بيعملوا عملية مص دم لولى الامر من ناحية تانية ازاى دول بالاخص يضربوا ده الثوره لما قامت قالوا العلم الى هيعمل كل شىء هيجى منين تقدم لدولة والمعلمين مضربين عن العمل
يروحوا في نصيبه بتوع كليات التربيه مرمين وبعدين هو احنا كنا بنفهم منهم حاجه يروحوا يتنلوا
Eslam Mohamed
والة أنا عندى اقتراح (الثواب و العقاب) بمعنى المدرسين عايزين زيادات طب نديهم المبالغ المطلوبة وكدة نبقى عطناهم حقهم ودة هو الثواب أما العقاب أذا تم أثبات أن احدهم يقوم بأعطاء دروس خصوصية فيتم فصلة نهائيا من الخدمة بعد اجراء تحقيق معة و قيام...ة بسداد الضرائب المستحقة علية وذلك بنص قانونى يتم أصدارة و التأكد من صحتة حتى لا يتم الطعن فية وبالتالى فأنة يتم حفظ حق المجتمع و الطلاب و كافة حقوق الشعب و ذلك بعد التشهيير بة و نشر أسمة بكافة الجرائد القومية(المدرس) حيث يتم التعامل مع الدروس الخصوصية كرشوة وجريمة مخلة بالشرف فتصبح الدروس الخصوصية جريمة يجرمعا القانون ما مجموعات التقوية و الدروس التى يقدمها المدرس بعد فتح ملف ضريبي لة ويعامل كنشاط تجارى هادف للربح 000000يرجى التكرم بالافادة عن الرأى
لما نجيب مدرب للفريق الخايب بتاعنا بياخد 300 ألف جنيه مرتب غير الإقامة والإنتقالات والمكافاءات ... يعني حيعدي 600 ألف جنيه في الشهر ... يعني بمرتب 200 مدرس من المضربين ... يبقى نعم و 600 ألف نعم كمان للإضراب ... على الأقل يمكن العيال لو خابت في التعليم يطلعوا بتوع كورة ويكسبوا بالملايين ... بلد ماشية بضهرها ( بلاش الكلمة التانية علشان عيب) .
مذكرات مدرسة بضم الميم ( سابقا )
اشتغلت مدرسة 13 سنة من 1996 لحد 2009 اول مرتب قبضته 89.90 و لأنى كنت باشتغل فى ادارة غير إدارتى كنت بادفع مواصلات فى الوقت ده حوالى 65 جنيه شهريا و اتعينت فى مدرسة من أقذر ما يمكن لخيالكم ان يتخيل مدرسة إعدادى فترتين كانت فى يوم من الايام فى الماضى سجن و يطلق عليها مدرسة السلخانة و فى الفناء قد ترى فأرا او عرسة يسير فوق صنابير المياه التى يشرب منها التلاميذ. و إياك أن تحاول ان تمر أمام الحمامات فقد تصاب بضيق دائم فى التنفس من محاولتك فى كتم أنفاسك او قد تصاب بالمرض الذى اخترعت اسمه ايامها " ربو الحمامات ". أنا : "عمال النضافة فى المدرسة ؟؟؟بيعملوا يه ؟؟ ليه مش بينضفوا الحمام ؟؟" المدرسون القدامى: "عمال مين يا ماما دول باشوات هما فاضيين ؟؟" فى الفسحة بيبيعوا ساندوتشات و حاجة ساقعة و بسكويت وكده و قبل الفسحة اللى بيشترى فطار للمدرسين و للى بيعمل لهم الشاى و كده و بعض العاملات ( على جنب فى الخباثة كده ممكن تنضف خضار لاحدى المدرسات ممكن تعملها حلة محشى تقور لها شوية باذنجان او كوسة ) فى الاول طبعا قلت حسبى الله و نعم الوكيل سايبين شغلهم و بيعملوا بيزنس لكن مع التواجد فى المدرسة و لأنى باحكم بما تراه عيونى و ليس ما اسمعه فقط بدأت الاحظ تدنى مستواهم المادى و قلت لنفسى: "بلا نيلة اذا كنت انا خريجة الجامعة مرتبى كده هايكونوا هما بياخدوا كام" و فعلا بعد التحرى و التقصى لقيت الناس دى افقر من الفقر و أغلب من الغلب و حالهم يصعب ع الأموات مش بس ع الكافر و فهمت هما ليه بيعملوا كده.
من المفارقات اللطيفة ان المدرسة كانت مكونة من 3 مبان منها اثنان متصلان بممر و مبنى منفصل تماما و الكوميدى ان هذا المبنى كان يطلق عليه " مبنى السجن" و ماشاء الله كل شبابيك الفصول فى المبنى ده عاليه جدا و محاطة بسلك . المدرسة تقع فى منطقة شعبية معظم المدرسين يسكنون بالقرب من المنطقة اللهم الا من فتح الله عليهم و استطاعوا ان يستأجروا او يشتروا شققا بعيدا عن المنطقة و التى كانت تشتهر فى أدغالها ببيع المخدرات و ما اثبت لى ذلك ان علمت ان بالمدرسة تلميذة اسمها "رشا أودو" اسفة : المعلمة رشا أودوفقد كانت معروفة بهذا الاسم للمدرسين و التلميذات والديها فى السجن فى قضايا مخدرات و حشيش و هى بأه كان الله فى عونها بتكمل المشوار.
الذهاب للمدرسة كان معاناة غير موصوفة فالمدرسة كانت فترتين و حظى الاسود انى اشتغلت فى الفترة المسائية و عند الخروج من المدرسة فى حوالى السابعة مساءا كنت بالاقى الدنيا هس هس خصوصا ان المدرسة تطل على كوبرى و ما أدراكم ما الكبارى بالليل و اوعى حد يتخيل كلمة كوبرى زى كوبرى اكتوبر و الا قصر النيل و الا كوبرى استانلى و الا حتة كوبرى بنها ده كوبرى بيطل على ترعة فى منطقة مساكن شعبية من ناحية و من الناحية الاخرى ... والله ما انا عارفة مصانع قديمة او اشياء من هذا القبيل
الحلقة القادمة : الفصل : يا لهوى يا لهوى ع الفصل