لما شفت المشهد ده غمضت عينيا و شفت ايه ؟؟؟؟

شفت الامل فى قيام دولة العدل لان دولة الظلم كانت برتعت اوى و زادت عن حدها  شفت الامل فى قيام دولة القانون حاسبنى لو ماحطتش الحزام و انا سايقة بس كمان حاسب ابن اللوا فلان و ابن العميد علان و ابن عضو مجلش الشعب ترتان العدل و الحق يفقدان المصاقية اذا اكتالوا بمكيالين او اكتر من مكيال احترامى للقانون لن يأتى فقط من مبدأ ايمانى به و لكن حين يطمئن قلبى انه سيطبق على كما يطبق على غيرى و نحن فى دولة اسلامية هى اولى الدول بتطبيق هذا المبدأ و اذا لم نطبقه نحن فلا داعى لا ن نفتح عيوننا خلينا مغمضين احسن خلينا متقوقعين منا اللى مغمض و بيحلم و منا اللى مغمض و بيهرب و منا اللى مغمض و مستهبل و عامل مش شايف حاجة 

 

غمضت عينى و شفت ايه انهاردة؟؟

شفت عيال جدعان مصريين شجعان لا يعرفوا للخوف معنى و لا الموت عندهم بيترك صدى المهم و الاهم عندهم انتى؟؟؟ انتى مين ؟ انتى مصر و ولادك يا مصر

عملوا ايه ؟فكرة جديدة بسيطة بس نميسة مظاهرة كبيرة  يوووووه بأه ما كفاينا مظاهرات وقفتوا حال البلد و عجلة الانتاج و البلد خلاص هاتفلس . لأ العيال دول اذكى من كده زى ما كان الفيس بووك باب من ابواب اشعلت شعلة ثورتنا المسكينة هما كمان بيتظاهروا على الفيس بووك

مظاهرة الكترونية؟؟؟ مين كان ممكن يفكر اننا فى مصر نوصل للفكر ده طول عمرنا عندنا عقدة الخواجة طول عمرنا فاكرين نفسنا خايبين لعبوا علينا الخونة عشان يفقدونا احساسنا بقدراتنا بكياننا حتى بوجودنا

لكن  اهو الدليل شباب بيقولوا رايهم و بيعبروا عنه و بيعرفوا يجمعوا الناس حواليهم لتظاهرة الكترونية ضد المحاكمات العسكرية الجهجهونية ضد المدنيين ، ضد افراد من الشعب  تظاهرة ضد ممارسات المجلس العسكرى فى انتهاك حقوق الانسان داخل السجن الحربى

يا ترى الشباب اللى بيفكر كده تتوقع منه ايه لبناء مصر ؟؟ فى رايى كتيييييييير اوى بس احنا نديلهم الفرصة

يمكن كلامى عميانى بس غمض عينيك و شوف انت ممكن تعمل ايه لمصر لو انت من الشباب الجدعان دول اللى كسروا حواجز الخوف و جدران الصمت المميت الشباب اللى بيقول : إذا ماكانش عندك حلم يستحق تموت عشانه يبقى مافيش حاجة تستحق انك تعيش عشانها

غمض عينيك و شوف الشباب دول ممكن يعملوا ايه ؟؟؟

مصر مش بس اهرامات و نيل مصر هى فعلا المصرى الاصيل اللى ساعة الجد يقدر يهزم كلمة مستحيل ( شكرا حمزة نمرة على الكلام ده ) و انا مؤمنة بده جدا. عشان انا غمضت عينيا و شفت .... كل الخير بس سيبونا

حاجات كتير

مش عارفة اقول ايه بس فعلا غمضت عينيا فى ليلة و شوفتنى دايرة فى دوامة كبيرة و حسيت انى مش هاطلع منها الا لو فعلا كتبت اللى جوايا او بمعنى اصح لو كتبت اللى باشوفه بعقلى و احسه بقلبى و المسه بمشاعرى

و من هنا كانت البداية لأنى مش هاكتب الا لما اغمض عينيا و اشوف. و ازاى اشوف و انا مغمضة ؟ طبيعى جدا لأنه ساعات كتير الحقايق تتشاف بالقلب مش بالعين و معايا انا بالذات البصيرة اقوى كتير من البصر و يمكن عشان كده كلامى هايكون كلام عميانى